الله لا يهينكم اسأله للخبراااء فقط (شروكي)

[ص ا م 283]

السلام عليكم ورحمه الله وبركااته

هلا وغلا بشباب منتدا ملاك جيب

يا شبـــــــــاب

انا توي شاري شروكي م 99 باب قير عادي

ولا عندي اي خلفيه عن الشروكيات لأني السراحه راعي نصب

وعندي بعض المشاكل ما ادري هي طبيعيه او انه فيها بلاا طبعا منها المهم ومنها الا الاشياء الصغيره

وابغى فزعتكم

1- عندي مشكله اذا وقفت السياره وطفيته ورجعت لها بعد ساعيت علا الاقل القى تحت الموتر مويه من الرديتر
ولا ادري وش السبب يقولون يمكن طرمبه مويه وانا ما ادري ؟ ؟
اذا هي طرمبه بكم سعرها الاصلي واصلي السوق ؟؟ وكم يكلف تغييره ؟

2- والمشكله الثانيه عندي اذا كرشتله بالـثاني ما يتفتف يقطع بي ويهدي السرعه ؟؟ وش المشكله ؟
واذا فيه شي يبيله تغير بكم وبكم تركيبه وشغله الكامل

3- عندي الجالنط لامني رفعته لأخر شي بقووه يفلت ويروح للطقه اللي بعده ؟ واحيانا لامني لبقت في
مرتفع واسحب الجالنط اشووفه تدحدر علا خفيــف يعني لاززم اطفي واحطه بالاول
اذا فيه شي يبغاله تغيير . بكم سعره ؟وتصليحه ؟

4- اذا جيت احط القير بالريوس يقول كخخخخ ولازم احطه بالاول بعدين احطه بالريوس ؟
وش سبب ؟ وبكم تصليحه ؟ وش القطع اللي يحتاج ؟

هذي الاشياء اللي اعتبرها مهمه

نجي للأشياء العايديه

1- عندي لمبات الظباب اللي ورا ما يشتغلن كلهن ؟ بكم الوحده ؟

2- الطفايات <اللي ينشبك فيهن شاحن الجوال كلهن ما يشتغلن وش السبب ؟

3- الباب الخلفي حق الشنطه ما ينفتح ؟ وش السبب ؟ ما قد احد مر بالتجربه هذي ؟

||| والحين ابجي للكماليات |||

** ابركب جنوط جي تي مكحله 10 انش وسألت عندها 1300 هل هذا سعرها الحقيقي ؟

** كفرات دومينيتر 1400 هل هذا اسعرها ؟

** كم ارفع موتري من قداام ؟

علماً اني ما ابي ارفعه بسست لأني ما ابي مطبه يقسى ولا ابي اقوووس السست

** وكم ارفعه من وراا ؟ وانا شايف واحد رافعه 4 صانتي من ورا والسراحه انه طلع مهب مره ابي ارفع من كذا

** اشوف بالمنتدا انه لارفعت الموتر لازم انزل القير ؟ وش المقصود بـ تنزيل القير ؟ و وش الفيده ؟


||| وهنا ابي الاشياء اللي تنصحوني فيها اني اسويها مثل اي شي |||



واتمنى اني ما اكوووون ثقلت عليكم <<خليت فيها ثقل اصلاا خخخ

معليش تحملوني الله لا يهينكم

وانشالله مهوب بس انا اللي استفيد منها

انشالله الكل يستفيد

ملاحظه : اللي ما يعرف تكفون لا يرد الا بعدين بعد ما يجاوبون اهل الخبره , علشان اللي يبغا يستفيد غيري
ما يروح يدور بالصفحات , يلقاها كلها بالصفحه الاولى

ولكم مني جزيل الشكر

[W A F I]

شف ياطويل العمر والسلامة

ابجاوب على الاسئلة اللى اعرفها بس

1- عندي مشكله اذا وقفت السياره وطفيته ورجعت لها بعد ساعيت علا الاقل القى تحت الموتر مويه من الرديتر


قبل ماتسوي اي شي تأكد من الرديتر يمكن فية تهريب ..


2- الطفايات <اللي ينشبك فيهن شاحن الجوال كلهن ما يشتغلن وش السبب ؟

احتمال فيوز

3- الباب الخلفي حق الشنطه ما ينفتح ؟ وش السبب ؟ ما قد احد مر بالتجربه هذي ؟


جرب دف الباب على قدام وانت تفتحة



والله يوفقك في الموتر

ادري اني ماجاوبت الا على سؤال او اثنين لكن بيجاوبونك ان شاء الله

[ص ا م 283]

مشكووور اخوي الوافي

لا هنت

انشالله يفيدوناا الباقين

[Jeeper]

حياك اخوي :
1- مثل ما قال الوافي شيك على الاديتر و الخراطيش اللي طالعه منه.
2- احتمال طرمبة بنزين او حساس الثروتل بدي tps .
3-لازم تفك الدرج اللي بين المقاعد و تنظف السنون تبع الجلنط و اذا كانت مكسوره لازم تتغير. اذا الموتر يدحدر وانت رافع الجلنط لازم تشد الواير (من تحت السياره) . نفس المشكله كانت عندي وظبطت الموتر بنفسي.
4- ما عندي علم . (لازم تروح لمكانيكي) .

بالنسبه للجنوط انصحك بالعشره انش.
الرفعه موجود موضوع فالمنتدى يفيدك كثير.

[ص ا م 283]

مشكوووور اخوي

الله لا يهينك

[احلى مزاج]

1- عندي مشكله اذا وقفت السياره وطفيته ورجعت لها بعد ساعيت علا الاقل القى تحت الموتر مويه من الرديتر
ولا ادري وش السبب يقولون يمكن طرمبه مويه وانا ما ادري ؟ ؟
اذا هي طرمبه بكم سعرها الاصلي واصلي السوق ؟؟ وكم يكلف تغييره ؟

ما اتوقع انها من طرمبة الموية لان الطرمبة ما تهرب الا اذا كان الموتر يشتغل ويكون لها صوت
تأكد من الرديتر لا يكون فيه تهريب أو الخراطيش لا تكون تعبانه او غطا الرديتر يهرب مويه

2- والمشكله الثانيه عندي اذا كرشتله بالـثاني ما يتفتف يقطع بي ويهدي السرعه ؟؟ وش المشكله ؟
الشروكي ما يتفتف مثل الهايلوكسات والربوع اما ان كان قصدك شي ثاني فياليت توضح اكثر

3- عندي الجالنط لامني رفعته لأخر شي بقووه يفلت ويروح للطقه اللي بعده ؟ واحيانا لامني لبقت في
مرتفع واسحب الجالنط اشووفه تدحدر علا خفيــف يعني لاززم اطفي واحطه بالاول
اذا فيه شي يبغاله تغيير . بكم سعره ؟وتصليحه ؟

شد الجلنط واذا شديته وما نفع فالمشكله عندك من القماشات تحتاج تغيير

4- اذا جيت احط القير بالريوس يقول كخخخخ ولازم احطه بالاول بعدين احطه بالريوس ؟
وش سبب ؟ وبكم تصليحه ؟ وش القطع اللي يحتاج ؟
ممكن وليس أكيد ان الكلتش فيه نص عمر لكن مش حالك لين ينتهي مره وغيره بعدها

1- عندي لمبات الظباب اللي ورا ما يشتغلن كلهن ؟ بكم الوحده ؟

فك الاصطبات الخلفيه بمفك 10 3 مسامير اتوقع واسحب الاصطب لكن انتبه فيه ربله تحت حاول تسايس الاصطب لين تطلع معاك عشان ما ينكسر وبدلها سعر اللمبة 5 ريال

2- الطفايات <اللي ينشبك فيهن شاحن الجوال كلهن ما يشتغلن وش السبب ؟

شيك على الفيوزات اللي عند البطارية وبرضو الفيوزات اللي تحتع عند كرسي الراكب

3- الباب الخلفي حق الشنطه ما ينفتح ؟ وش السبب ؟ ما قد احد مر بالتجربه هذي ؟

جب لي الموتر ومالك الا اللي يصلح بإذن الله :)

** ابركب جنوط جي تي مكحله 10 انش وسألت عندها 1300 هل هذا سعرها الحقيقي ؟

ما عندي خلفية الصراحه

** كفرات دومينيتر 1400 هل هذا اسعرها ؟

انا مركبها قبل سنة وشوي كان سعر الكفر ذيك الفترة بـ 275 ريال اذا كان فيه تغيير في السعر فما ادري عنه الصراحه

** كم ارفع موتري من قداام ؟

ركب كعكات 3 سم تحصلها في أي مخرطه سعر الوحده اتوقع ما بين 35- 50 ريال انت وشطارتك

وكم ارفعه من وراا ؟ وانا شايف واحد رافعه 4 صانتي من ورا والسراحه انه طلع مهب مره ابي ارفع من كذا
عند اكثر من طريقة لرفع الموتر (إضافة سستة وتقويسها أو تركيب لعابات أو تركيب مساعدات اعلى من الوكاله مثل (جبريال أو مونرو (جمس ابو ياي)

** اشوف بالمنتدا انه لارفعت الموتر لازم انزل القير ؟ وش المقصود بـ تنزيل القير ؟ و وش الفيده ؟

اذا رفعت الموتر بشكل واضح تحتاج انك تنزل القير 2 سم تقريبا يحطون لك بعضهم قطعه حديد بين القير وبين القاعدة حقت القير عشان عامود الكردان يكون على وضعه الطبيعي والمقارب للوكالة (تقريباً) عشان ما يكون فيه حره في الموتر او رجه وانت تمشي


ان شا الله انك حصلت على اللي تبي توصله سواء مني او من غيري


بالتوفيق ومباروك عليك الموتر والله يعطيك من خيره ويكفيك شره :)

[سيد شروكي]

2- والمشكله الثانيه عندي اذا كرشتله بالـثاني ما يتفتف يقطع بي ويهدي السرعه ؟؟ وش المشكله ؟
واذا فيه شي يبيله تغير بكم وبكم تركيبه وشغله الكامل

كل الشيروكيات تفتف بالأول لكن الثاني قليل منهم يعني الثاني على حسب خفة الموتر والجنوط اللي عليه والقوه والسده والتنزيله يعني موترك مافيه شيء طبيعي ...


- اذا جيت احط القير بالريوس يقول كخخخخ ولازم احطه بالاول بعدين احطه بالريوس ؟
وش سبب ؟ وبكم تصليحه ؟ وش القطع اللي يحتاج ؟



عى ماقال أخوي الكلتش يمكن يكون نص عمر لاتغيره ألين يخرب مرتن وحده والصوت كخخخ مامنه خوف بس اذا جيت تعشق ريوس دبل للكلتش وعشق قدام وراء ودق الريوس على خفيف ...


1- عندي لمبات الظباب اللي ورا ما يشتغلن كلهن ؟ بكم الوحده ؟

2- الطفايات <اللي ينشبك فيهن شاحن الجوال كلهن ما يشتغلن وش السبب ؟

مادامهم كلهم طافيات يمكن يكون فيوزهم واحد


** اشوف بالمنتدا انه لارفعت الموتر لازم انزل القير ؟ وش المقصود بـ تنزيل القير ؟ و وش الفيده ؟
اذا رفعت الموتر جربه احتمال يطلعلك رجه اذا طلعلك لازم تنزل القير شوي واذا ماطلعك لاتسوي شيء

موفق خير وأعذرنا على باقي الأسئله

[شروكي ربع]

1- عندي مشكله اذا وقفت السياره وطفيته ورجعت لها بعد ساعيت علا الاقل القى تحت الموتر مويه من الرديتر

ممكن طبات المكينة وممكن الرديتر فيه تهاريب بسيطة من الجوانب تندي منها وممكن من الشبك نفسه .


2- والمشكله الثانيه عندي اذا كرشتله بالـثاني ما يتفتف يقطع بي ويهدي السرعه ؟؟ وش المشكله ؟
واذا فيه شي يبيله تغير بكم وبكم تركيبه وشغله الكامل

كذا هي مكينة الشوركي مو زي التيوتا تتفتف , الشروكي يقطع وبعدين يرجع .

3- عندي الجالنط لامني رفعته لأخر شي بقووه يفلت ويروح للطقه اللي بعده ؟ واحيانا لامني لبقت في
مرتفع واسحب الجالنط اشووفه تدحدر علا خفيــف يعني لاززم اطفي واحطه بالاول
اذا فيه شي يبغاله تغيير . بكم سعره ؟وتصليحه ؟

شد جلنط عادي اي واحد يزينها .


4- اذا جيت احط القير بالريوس يقول كخخخخ ولازم احطه بالاول بعدين احطه بالريوس ؟
وش سبب ؟ وبكم تصليحه ؟ وش القطع اللي يحتاج ؟

كثير من السيارات كذا ولاهي مشكلة تقريباً .


1- عندي لمبات الظباب اللي ورا ما يشتغلن كلهن ؟ بكم الوحده ؟

لها فيش خاص ماتشتغل لحالها لازم تفتح الفيش قدام القير , واذا كلها ماتشتغل اكيد محروقه مر محلات قطع الغيار فيه الاصلي والتجاري وانت تنق .

2- الطفايات <اللي ينشبك فيهن شاحن الجوال كلهن ما يشتغلن وش السبب ؟

اعتقد غالبا فيوزاتها طاقه , تلقاها عن رجول الراكب .

3- الباب الخلفي حق الشنطه ما ينفتح ؟ وش السبب ؟ ما قد احد مر بالتجربه هذي ؟

بعد الاحيان يعلق كذا يحتاج تدفه وتجره كم مرة ويفتح معك اذا فتح زيـّت القفل أو بخ مزيل الصدأ ويضبط .

** ابركب جنوط جي تي مكحله 10 انش وسألت عندها 1300 هل هذا سعرها الحقيقي ؟

انا شاريها من سنتين بـ 1100 وكانت تباع بـ 1400 ريال يبيلك تفرفر الغرابي الين تلقى السعر الاحسن وممكن في الغرابي يفرق معك 200 ريال وزود لاتستغرب .

كفرات دومينيتر 1400 هل هذا اسعرها ؟

نفس الكلام اعلاه و آخر مرة شريت فيها هالكفر بـ 190 ريال للواحد في رمضان قبل الماضي ومو معقوله ارتفع 60 ريال !

كم ارفع موتري من قداام ؟

علماً اني ما ابي ارفعه بسست لأني ما ابي مطبه يقسى ولا ابي اقوووس السست

قدام ماهو سست يالغالي قدام يايات ركب لها كعكات وترتفع او غير الياي بأطول منه .


وكم ارفعه من وراا ؟ وانا شايف واحد رافعه 4 صانتي من ورا والسراحه انه طلع مهب مره ابي ارفع من كذا


لازم تقوس السست عالاقل او تزود وحدة .


اشوف بالمنتدا انه لارفعت الموتر لازم انزل القير ؟ وش المقصود بـ تنزيل القير ؟ و وش الفيده ؟

تنزيل القير على حسب الرفعه اذا رفعته حيل يحتاج تنزيل واذا رفعته شيء معقول مايحتاج , عموما متى مارفعته جرب السيارة وبيبان معك على طول في حرة العمود او لا .


||| وهنا ابي الاشياء اللي تنصحوني فيها اني اسويها مثل اي شي |||

اهم نصيحة لا عاد تكتب موضوع زي هذا :unlock:

تكسرت يدينا في الرد :mhtar:

[AL-GHANEM]

1- عندي مشكله اذا وقفت السياره وطفيته ورجعت لها بعد ساعيت علا الاقل القى تحت الموتر مويه من الرديتر
ولا ادري وش السبب يقولون يمكن طرمبه مويه وانا ما ادري ؟ ؟
اذا هي طرمبه بكم سعرها الاصلي واصلي السوق ؟؟ وكم يكلف تغييره ؟
يالغالي مانقدر نحدد الخلل من وصفك فيةاحتمالات كثيرة من تهريب

2- والمشكله الثانيه عندي اذا كرشتله بالـثاني ما يتفتف يقطع بي ويهدي السرعه ؟؟ وش المشكله ؟
واذا فيه شي يبيله تغير بكم وبكم تركيبه وشغله الكامل
الشروكي مايتفتف طبيعي كذا لااحد يلعب عليك بس

3- عندي الجالنط لامني رفعته لأخر شي بقووه يفلت ويروح للطقه اللي بعده ؟ واحيانا لامني لبقت في
مرتفع واسحب الجالنط اشووفه تدحدر علا خفيــف يعني لاززم اطفي واحطه بالاول
اذا فيه شي يبغاله تغيير . بكم سعره ؟وتصليحه ؟
شد الجلنط امرة سهل
4- اذا جيت احط القير بالريوس يقول كخخخخ ولازم احطه بالاول بعدين احطه بالريوس ؟
وش سبب ؟ وبكم تصليحه ؟ وش القطع اللي يحتاج ؟
اذا نزلت القير شوي راح الصوت مايحتاج قطع غيار شغل يد 150ريال فقط

1- عندي لمبات الظباب اللي ورا ما يشتغلن كلهن ؟ بكم الوحده ؟
3ريال- 5ريال انت ومزاجك
2- الطفايات <اللي ينشبك فيهن شاحن الجوال كلهن ما يشتغلن وش السبب ؟
فيوز
3- الباب الخلفي حق الشنطه ما ينفتح ؟ وش السبب ؟ ما قد احد مر بالتجربه هذي ؟
صارت معي وغيرت مسكة باب 50 ريال


** ابركب جنوط جي تي مكحله 10 انش وسألت عندها 1300 هل هذا سعرها الحقيقي ؟
رح الغرابي افتر في كل المحلات تحصل ارخيص ولو تاخذ مستعمل اوفر لك
** كفرات دومينيتر 1400 هل هذا اسعرها ؟
ماعندي خلفية عن السعر
** كم ارفع موتري من قداام ؟
على حسب مزاجك الرفعة
علماً اني ما ابي ارفعه بسست لأني ما ابي مطبه يقسى ولا ابي اقوووس السست

** وكم ارفعه من وراا ؟ وانا شايف واحد رافعه 4 صانتي من ورا والسراحه انه طلع مهب مره ابي ارفع من كذا
حط 5 سم ومساعدات مرسدس اذا انت تحب الشقلة
** اشوف بالمنتدا انه لارفعت الموتر لازم انزل القير ؟ وش المقصود بـ تنزيل القير ؟ و وش الفيده ؟
اذا رفعت السيارة ومانزلت القير تسمع اصوات تحت رجلك :rip:

||| وهنا ابي الاشياء اللي تنصحوني فيها اني اسويها مثل اي شي |||
1- لاتروح تصلح عند ناس ماتفهم ميكانيكا >>>> (حوثي )
2- لاتركب جنط 10 انش يعدم الدفرنس عليك

اي خدمة تحت امرك اسال قبل تصلح والله يطعمك من خيرها ويكفيك شرها :busted_cop:

[ص ا م 283]

الف الف الف شكر

والله ما قصرتووو


كفيتو و وفيتوووو

الله لا يهينكم

مشكوووورين